Самарқанд ва UC Davis қишлоқ хўжалиги соҳасидаги ҳамкорликни кенгайтирмоқда

Тошкент, Ўзбекистон (UzDaily.uz) — Самарқанд вилояти ҳокими Адиз Бобоев Калифорния штатидаги University of California, Давис таркибида фаолият юритувчи "UC Davis Foundation Plant Services" илмий марказида бўлди.

Мазкур марказ қишлоқ хўжалиги учун юқори сифатли, касалликлардан ҳоли ўсимлик кўчатларини етиштириш, уларни кўпайтириш, текшириш ва тарқатишга ихтисослашган. Бу ерда узум, мевали дарахтлар, қулупнай, картошка ҳамда бошқа экинларнинг вирусдан ҳоли элита кўчатлари етиштирилади.

Шунингдек, лаборатория ва диагностика хизматлари, импорт ҳамда карантин назорати йўлга қўйилган. Марказ замонавий лабораториялар, иссиқхоналар ва махсус ҳимояланган плантациялар билан жиҳозланган бўлиб, минглаб ўсимлик турлари ва навлари коллекциясини ўзида жамлаган.

Марказ билан танишув жараёнида қатор муҳим ташаббуслар муҳокама қилинди. Хусусан, Самарқанд вилоятида мевали боғлар учун касалликлардан ҳоли, сертификатланган кўчатлар ишлаб чиқариш тизимини жорий этиш, “UC Davis” тажрибаси асосида фитосанитар стандартларни кучайтириш ва экспортбоп маҳсулотлар сифатини ошириш масалалари кўриб чиқилди.

Самарқандда ўсимлик касалликларини аниқлаш лабораторияларини ташкил этиш, замонавий биотехнологик диагностика усулларини жорий қилиш ҳамда илмий кадрлар малакасини оширишда ҳамкорликни йўлга қўйиш масаласига алоҳида эътибор қаратилди.

Шу билан бирга, иқлим ўзгаришига мослашган янги экин навларини яратиш, сув тежамкор агротехнологияларни ривожлантириш ва тупроқ унумдорлигини оширишга қаратилган инновацион лойиҳаларни амалга ошириш масалалари ҳам муҳокама қилинди.

Таълим йўналишида эса Самарқанд аграр университети талабалари ва мутахассислари учун АҚШда стажировка дастурларини йўлга қўйиш, қўшма тренинг ва семинарлар ташкил этиш ҳамда онлайн таълим платформаларини жорий қилиш юзасидан таклифлар билдирилди.

Томонлар ўзаро манфаатли ҳамкорликни ривожлантириш бўйича аниқ вазифаларни белгилаб олдилар. Ушбу келишувлар Самарқанд вилоятида инновацион ва экспортга йўналтирилган қишлоқ хўжалиги тизимини шакллантиришда муҳим аҳамият касб этади.