Centrum Air reysi chaqmoq zarbasidan keyin kechikdi

Toshkent, O‘zbekiston (UzDaily.uz) — Centrum Air aviakompaniyasi Toshkent — Guanchjou — Toshkent yo‘nalishi bo‘yicha reys majburiy kechiktirilganini maʼlum qildi. Bunga ushbu yo‘nalishdagi avvalgi parvozni amalga oshirgan havo kemasining parvoz vaqtida chaqmoq zarbasiga uchragani sabab bo‘lgan.

Kompaniya tushuntirishicha, amaldagi aviatsiya standartlari va xavfsizlik talablariga muvofiq samolyot zudlik bilan ekspluatatsiyadan chiqarilgan. Bu qaror to‘liq texnik ko‘rik, diagnostika va zarur tiklash ishlarini o‘tkazish maqsadida qabul qilingan.

Tekshiruv yakunlariga ko‘ra, aviakompaniya mazkur yo‘nalishda xizmat ko‘rsatuvchi havo kemasini almashtirishga qaror qildi. Bu esa jadval o‘zgarishiga va 16 may kuni amalga oshirilishi kerak bo‘lgan qaytish reysining kechikishiga olib keldi.

Kutish davrida yo‘lovchilar mehmonxonaga joylashtirilgan va kuniga uch mahal ovqat bilan taʼminlangani aviakompaniya tomonidan maʼlum qilindi.

Yangilangan jadvalga ko‘ra, reysning Guanchjoudan uchib ketishi 18 may kuni mahalliy vaqt bilan soat 20:25 ga belgilangan. Toshkentga yetib kelishi esa keyingi kun soat 00:50 da kutilmoqda.