“УзНИФ“ I чорак якунларига кўра 417 млрд сўм зарар қайд этди

Тошкент, Ўзбекистон (UzDaily.uz) — Ўзбекистон Миллий инвестиция жамғармасининг (“УзНИФ“) 2026 йил I чорак учун МҲХС бўйича соф зарари 417,4 млрд сўмни ташкил этди (2025 йил якунлари бўйича — 1,4 трлн сўм фойда). Операцион зарар эса 520 млрд сўмдан ошди.

Акцияларга киритилган инвестициялардан, фойда ёки зарар орқали адолатли қийматда ҳисобга олинадиган, соф реализация қилинмаган фойда -520,7 млрд сўмни ташкил этди. Бу фонд портфелидаги акциялар қийматининг ўсиши/пасайишидир, бироқ акцияларнинг ўзи ҳали сотилмаган.

Ҳисобот даврида дивиденд даромади қайд этилмади, чунки фонд портфелига кирувчи компаниялардан дивиденд тўловлари жорий йилнинг II–III чоракларида кутилмоқда. Жумладан, “ЎзРТХБ“ апрель ойида дивиденд тўловларини амалга оширди ва бу фонднинг ИИ чорак ҳисоботида акс этади.