Ўзбекистон саноат ишлаб чиқариши 7,8 фоизга ўсди

Тошкент, Ўзбекистон (UzDaily.uz) — 2026 йил январь–апрель ойларида Ўзбекистонда саноат ишлаб чиқариши ҳажми 394,7 триллион сўмни ташкил этиб, 2025 йилнинг мос даврига нисбатан 7,8 фоизга ошди. Бу ҳақда Миллий статистика қўмитасининг дастлабки маълумотларида келтирилган.

2026 йил 1 май ҳолатига кўра, мамлакатда 61,4 мингта саноат корхонаси фаолият юритган. Энг кўп корхоналар озиқ-овқат маҳсулотлари ишлаб чиқариш соҳасида қайд этилган — 12,3 мингта ёки умумий сонинг 20 фоизи. Шунингдек, нометалл минерал маҳсулотлар ишлаб чиқариш — 8,6 мингта ёки 14 фоиз, кийим-кечак ишлаб чиқариш — 6,2 мингта ёки 10 фоиз, металл буюмлар, мебель ва текстиль маҳсулотлари ишлаб чиқариш соҳаларида ҳам юқори кўрсаткич кузатилган.

Мамлакат бўйича аҳоли жон бошига саноат ишлаб чиқариши ўртача 10,3 миллион сўмни ташкил этди. Энг юқори кўрсаткичлар Навоий вилоятида — 90,3 миллион сўм, Тошкент шаҳрида — 20 миллион сўм ва Тошкент вилоятида — 18,6 миллион сўм даражасида қайд этилган.

Аҳоли жон бошига ишлаб чиқариш ўсиш суръати мамлакат бўйича ўртача 105,9 фоизни ташкил қилди. Ўртача кўрсаткичдан юқори натижалар Жиззах, Андижон ва Самарқанд вилоятларида — 107,3 фоиз, Сирдарё вилоятида — 106,8 фоиз, Наманган ва Бухоро вилоятларида эса 106,5 фоиз даражасида кузатилган.

Саноат ишлаб чиқариши таркибида асосий улуш қайта ишлаш саноати ҳиссасига тўғри келиб, 338,5 триллион сўм ёки 85,8 фоизни ташкил этган. Кончилик ва фойдали қазилмалар қазиб олиш соҳаси — 27,5 триллион сўм ёки 7 фоиз, электр энергияси, газ ва иссиқлик таъминоти — 26,6 триллион сўм ёки 6,7 фоиз, сув таъминоти ва чиқиндиларни қайта ишлаш соҳаси эса 2,1 триллион сўм ёки 0,5 фоизни ташкил қилган.

Ҳисобот даврида мамлакатда 12,6 миллиард куб метр табиий газ, 209 минг тонна нефть, 1,3 миллион тонна кўмир, 417,5 минг тонна автомобиль бензини, 381 минг тонна дизель ёқилғиси, 6,5 миллион тонна портландцемент, 262,9 минг тонна ип-калава ва 526,6 минг тонна буғдой уни ишлаб чиқарилган.

Қайта ишлаш саноати таркибида озиқ-овқат маҳсулотлари улуши 16,3 фоизни, текстиль ва кийим-кечак — 14,6 фоизни, тайёр металл буюмлари ва машинасозлик — 16,3 фоизни, кимё ҳамда резина-пластмасса маҳсулотлари эса 6,4 фоизни ташкил этган.

Технологик тузилмага кўра, юқори технологияли сектор улуши 1 фоиз, ўртача юқори технологияли сектор — 17,9 фоиз, ўртача паст технологияли сектор — 46,6 фоиз ва паст технологияли сектор — 34,5 фоизни ташкил қилди.

Электр энергияси ишлаб чиқариш ўтган йилга нисбатан 4,7 фоизга ошган. Шу билан бирга, йирик корхоналарда иссиқлик энергияси ишлаб чиқариш 82,4 фоизгача пасайган. Шунингдек, текстиль чиқиндилари ҳажми 16,2 фоизга камайгани ва оқова сувларни тозалаш ҳамда утилизация қилиш хизматлари ҳажми 15,2 фоизга ошгани қайд этилган.