Ўзбекистон Марказий Осиёнинг IT-хабига айланмоқчи

Тошкент, Ўзбекистон (UzDaily.uz) — Ўзбекистон инфратузилмани ривожлантириш, бизнесни қўллаб-қувватлаш ва сунъий интеллект технологияларини жорий этиш орқали Марказий Осиёдаги етакчи ахборот технологиялари марказига айланишни мақсад қилган. Бу ҳақда рақамли технологиялар вазири Шерзод Шерматов чоршанба куни бўлиб ўтган чиқишида маълум қилди.

Баёнот Самарқанд шаҳрида ўтаётган M360 Eurasia 2026 форумида янгради. Вазир мамлакат IT-компанияларни жалб қилиш учун шарт-шароитларни изчил шакллантираётганини, жумладан солиқ имтиёзлари тақдим этилаётгани ва бизнесни тартибга солишнинг янги тизими ишлаб чиқилаётганини таъкидлади.

Шерматовнинг айтишича, Ўзбекистон Жаҳон банкининг GovTech етуклик индексида 9-ўринни эгаллаб турибди. Шунингдек, мамлакатда 2030 йилгача мўлжалланган стратегия амалга оширилаётгани қайд этилди. Ушбу стратегия бюрократик тўсиқларни қисқартириш ва бизнес учун маъмурий жараёнларни оптималлаштиришга қаратилган.

Инсон капиталини ривожлантиришга ҳам алоҳида эътибор қаратилмоқда. Вазирнинг сўзларига кўра, “Беш миллион сунъий интеллект етакчилари” дастури доирасида ҳозирга қадар 1 миллиондан ортиқ ёш мутахассис тайёрланган.