Ferrit Ўзбекистонда кончилик ускуналари ишлаб чиқаришни йўлга қўйиши мумкин

Тошкент, Ўзбекистон (UzDaily.uz) — 15 май куни ИССВ вазири ўринбосари Акрам Алиев Швециянинг «Ferrit» компанияси минтақавий директори Дмитрий Нагорний билан учрашди.

1993 йилда ташкил этилган Швециянинг «Ferrit» компанияси кон-металлургия ускуналарини лойиҳалаш ва ишлаб чиқариш, шунингдек, ер ости логистикаси ва тоннель қурилиши ечимларига ихтисослашган. 2024 йил якунларига кўра, корхона тоғ-кон техникасини ишлаб чиқарувчи дунёдаги энг йирик 50 та компания рўйхатига кирди. Бугунги кунда компания дунёнинг тўққизта мамлакатида, жумладан, Хитой, Полша, Мексика ва Қозоғистонда ўз филиаллари ҳамда сервис марказларига эга.

Музокаралар давомида хорижий томон Ўзбекистонда яратилган инвестициявий муҳитни юқори баҳолади ва геология соҳасида қўшма ташаббусларни амалга оширишга катта қизиқиш билдирди. Бунда «Ferrit» компаниясининг республикамизда тоғ-кон саноати эҳтиёжлари учун техникалар ишлаб чиқаришни йўлга қўйишга тайёрлигига алоҳида эътибор қаратилди.

Томонлар ўзаро манфаатли ҳамкорликни кенгайтириш истиқболлари ҳамда юқори қўшилган қийматга эга маҳсулотлар чиқариш учун замонавий технологияларни жорий этишни муҳокама қилдилар. Учрашув якунида лойиҳаларни тез фурсатларда амалий босқичга ўтказиш мақсадида инвестициявий ҳамкорликнинг самарали механизмларини шакллантириш бўйича қўшма ишчи гуруҳ тузишга келишилди.