Buxoro viloyatida tuman sog‘liqni saqlash rahbari pora bilan ushlandi

Toshkent, O‘zbekiston (UzDaily.uz) — Buxoro viloyatida tuman sog‘liqni saqlash bo‘limi rahbari pora olish vaqtida qo‘lga olindi, shuningdek byudjet mablag‘laridan noqonuniy foydalanish holatlari aniqlandi. Bu haqda huquqni muhofaza qiluvchi organlar xabar berdi.

Tergov maʼlumotlariga ko‘ra, tuman sog‘liqni saqlash bo‘limi hamda dori vositalari va tibbiy buyumlarni ulgurji savdo qilish bilan shug‘ullanuvchi MCHJ o‘rtasida 1 milliard 2 million so‘mlik tibbiy mahsulot xaridi bo‘yicha shartnoma tuzilgan.

Dastlab shartnoma mablag‘ining 30 foizi kompaniya hisob raqamiga o‘tkazilgan. Keyinchalik tuman sog‘liqni saqlash bo‘limi rahbari qolgan 70 foiz mablag‘ni o‘tkazish va kelgusidagi hamkorlik uchun shartnoma qiymatining 15 foizi miqdorida, yaʼni 150 million so‘m “mukofot” talab qilgan.

Davlat xavfsizlik xizmati tomonidan o‘tkazilgan tezkor tadbir natijasida u turmush o‘rtog‘i orqali 11 800 AQSH dollarini olayotgan vaqtida qo‘lga olingan.

Shuningdek, aniqlanishicha, mansabdor shaxs joriy yilda oilaviy poliklinika xodimlariga ajratilgan 448 million so‘m mablag‘ni yarmini qaytarish sharti bilan bergan va noqonuniy ravishda 92 million so‘mni qayta olgan.

Mazkur holat yuzasidan jinoyat ishi qo‘zg‘atilgan.

Tuman sog‘liqni saqlash bo‘limi rahbariga nisbatan Jinoyat kodeksining 210-moddasi (pora olish) va 167-moddasi (o‘zlashtirish yoki rastrata yo‘li bilan talon-toroj qilish) bo‘yicha, MCHJ vakiliga nisbatan esa 211-moddasi (pora berish) bo‘yicha tergov harakatlari olib borilmoqda. Hozirda dastlabki tergov davom etmoqda.