Зарафшонда бир кунда тўрт жуфт эгизак туғилди

Тошкент, Ўзбекистон (UzDaily.uz) — Навоий вилоятининг Зарафшон шаҳрида шаҳар тиббиёт бирлашмасининг туғруқ бўлимида бир кун ичида тўрт жуфт эгизак туғилди.

Бу ҳақда Ўзбекистон Соғлиқни сақлаш вазирлиги матбуот хизмати хабар қилди. Маълум қилинишича, ноёб ҳолат бир тиббиёт муассасасида кузатилган бўлиб, у ерга етказилган тўрт нафар аёл кейинчалик эгизак фарзандли бўлган.

Идора маълумотларига кўра, Камола Садинова икки нафар ўғил фарзандни дунёга келтирган.

Мафтуна Тоирова бир ўғил ва бир қиз фарзандли бўлган.

Меҳринисо Насриддинова ҳам бир ўғил ва бир қиз фарзандни дунёга келтирган.

Шаҳло Равшанова эса бир ўғил ва бир қиз фарзандли бўлган.

Қайд этилишича, барча туғруқлар тажрибали акушер-гинекологлар, неонатологлар ва реаниматологлар иштирокида муваффақиятли амалга оширилган.

Ҳозирда оналар ва янги туғилган чақалоқлар тиббиёт мутахассислари назорати остида бўлиб, уларнинг аҳволи қониқарли деб баҳоланмоқда.

Соғлиқни сақлаш вазирлиги маълумотларига кўра, 2026 йилнинг биринчи чорагида Ўзбекистонда 4 363 та эгизак туғилиш ҳолати қайд этилган.

Шулардан 4 231 таси эгиз туғруқларни ташкил этган бўлса, 132 та ҳолат уч эгизак ва ундан кўп ҳомилали туғилишларга тўғри келган.