Тошкент, Ўзбекистон (UzDaily.uz) —  8-10 август кунлари Хивада Туризм қўмитаси ва Хоразм вилояти ҳокимлиги томонидан ташкил этилган ёрқин гастрономик ва маданий тадбир "Қовун сайли - 2025" фестивали ўтказилмоқда.

Бу байрам қовунчилик, ҳунармандчилик ва туризм анъаналарини ўзида мужассам этган. Тадбирнинг асосий майдонлари – «Ичан-қалъа» тарихий мажмуаси ва “Арда Хива” замонавий сайёҳлик маркази - ширин қовунлар ҳиди, халқ қўшиқлари, театрлаштирилган томошалар ва ярмаркалар билан тўлиб-тошмоқда.

19 та стендда Хоразм вилоятининг туманлари, илғор фермер хўжаликлари ва бошқа иштирокчилар ўнлаб қовун навлари, ўз маҳсулотлари, технологиялари ҳамда ютуқларини намойиш этмоқда. Энг яхшилари мукофот ва совринлар билан тақдирланадилар. Меҳмонлар қовунларни татиб кўриш, ишлаб чиқарувчилар билан суҳбатлашиш ва минтақанинг қишлоқ хўжалиги анъаналари ҳақида кўпроқ маълумот олиш имкониятига эга бўлмоқдалар.

Фестиваль дегустация ва кўргазмалардан ташқари, бой маданий дастур ҳам тақдим этмоқда: фольклор жамоаларининг чиқишлари, миллий таомлар тайёрлаш бўйича маҳорат дарслари, ҳунармандчилик ярмаркалари ва халқ ўйинлари ўтказилмоқда. Очиқ ҳавода ўтказилаётган анъанавий спорт мусобақалари ва пазандачилик намойишлари томошабинларда алоҳида қизиқиш уйғотмоқда.

Меҳмонларни Ўзбекистон ва бошқа мамлакатлардан келган машҳур санъаткорлар иштирокидаги унутилмас концертлар кутмоқда. Дастурда ДЖ Эндиго, афсонавий Тоҳир Содиқов, таниқли хонанда ЖОНЙ ҳамда бошқа истеъдодли мусиқачиларнинг чиқишлари ўрин олган.

Фестиваль нафақат Хоразм вилоятининг сайёҳлик ва қишлоқ хўжалиги салоҳиятини намоён этмоқда, балки байрам кайфиятини яратиб, тобора кўпроқ маҳаллий ва хорижий сайёҳларни ўзига жалб қилмоқда.