Тошкент, Ўзбекистон (UzDaily.uz) — Пойтахт ҳокимлигида гўшт ва жонли қорамолни импорт қилувчи 70 нафардан ортиқ тадбиркорлар ҳамда чорвачилик фермалари вакиллари билан кенгайтирилган учрашув ўтказилди.

Асосий эътибор аҳолини ҳамёнбоп ва сифатли гўшт билан таъминлаш, нархларни барқарорлаштириш ва харидорлар учун қулай шароитлар яратишга қаратилди.

Учрашув давомида энг муҳим озиқ-овқат маҳсулотларидан бири бўлган гўштнинг етказиб бериш ва нархлар барқарорлигига аҳоли ишончини таъминлашга ёрдам берадиган ҳамкорликдаги чора-тадбирлар муҳокама қилинди.

Очиқ мулоқот давомида тадбиркорлар логистика, божхона тартиб-қоидалари, солиқ солиш ва ветеринария назорати билан боғлиқ асосий муаммоларини баён қилишди. Баъзи масалалар жойида ҳал этилди, қолганлари ҳокимият ва тегишли идоралар назоратига олинди.

Тадбиркорларнинг Гўшт ва жонли қорамол импортёрлари уюшмасини ташкил этиш бўйича ташаббусига алоҳида эътибор қаратилди. Бу нархларни тартибга солиш ва бозорни таъминлашда тизимли ёндашувни йўлга қўйиш имконини беради. Шаҳар ҳокими ва барча иштирок этган масъул тузилмалар вакиллари ушбу таклифни тўлиқ қўллаб-қувватладилар.

Учрашувда Давлат солиқ қўмитаси, Давлат божхона қўмитаси, Давлат ветеринария назорати бошқармаси, прокуратура ва бошқа тузилмалар вакиллари иштирок этиб, улар тадбиркорлар билан биргаликда аҳолини гўшт маҳсулотлари билан барқарор таъминлаш устида ишлайдилар.

Ҳокимлик озиқ-овқат хавфсизлиги масалаларини алоҳида назоратда сақлашини ва пойтахт аҳолиси учун озиқ-овқат маҳсулотлари нархлари ҳамиша қулай бўлишига ҳаракат қилишини таъкидлади.