Тошкент, Ўзбекистон (UzDaily.uz) — «Ўзелтехсаноат» уюшмаси томонидан Ўзбекистоннинг Россиядаги Элчихонаси ҳамда Савдо ваколатхонаси кўмагида Россиянинг йирик иссиқлик ва совутиш тизимлари импортчиси ва ишлаб чиқарувчиси саналган «R-Климат» компаниясига ташриф уюштирилди.

Ташриф чоғида компаниянинг Бизнесни ривожлантириш директори Валентин Саломин ва Молия директори Александр Данилченко билан учрашув бўлиб ўтди.

Унда совутиш ва иситиш тизимлари бўйича Ўзбекистонда ишлаб чиқарилаётган маҳсулотларни OEM ва ODM асосида ишлаб чиқариб, Россия бозорига етказиб бериш бўйича таклифлар билдирилди.

«R-Климат» компанияси – 2024 йилда Россияга жами қиймати 122 млн долларлик совутиш ва иситиш тизимлари, мис маҳсулотлари импорт қилган. Balu, Electrolux брендлари (лицензия) остида Россия бозорида маҳсулот сотади.

Шунингдек, учрашувда “Sam Ferre” МЧЖ ҳамда «Технопарк» МЧЖ корхоналари томонидан ишлаб чиқарилаётган маҳсулотлар намойиш этилиб, компания вакилларига ҳамкорлик таклифлари тақдим этилди.