Тошкент, Ўзбекистон (UzDaily.uz) — 1 август ҳолатига кўра, Ўзбекистоннинг олтин-валюта захиралари ҳажми 48,74 миллиард АҚШ долларини ташкил қилди. Бу июл ойига нисбатан 193,7 миллион долларга ёки 0,4% га кўпдир. Бу ҳақдаги маълумотлар Марказий банк томонидан эълон қилинган.

Асосий ўсиш Марказий банк захираларида сақланаётган олтин қийматининг ошиши ҳисобига юз берди. У 265 миллион долларга кўтарилиб, 38,68 миллиард долларга етди ва янги рекорд даражани қайд этди.

Шу билан бирга, олтин захирасининг жисмоний ҳажми ўзгаришсиз қолиб, 11,7 миллион трой унцияни ташкил этмоқда. Ўсиш фақатгина қимматбаҳо металлнинг бозор нархи ортиши билан боғлиқ.

Шу билан бир вақтда мамлакатнинг валютa захиралари 366,3 миллион долларга камайиб, 8,48 миллиард долларни ташкил қилди. Улардан 1,05 миллиард доллар хорижий давлатлар марказий банклари ва Халқаро валюта жамғармасидаги ҳисобларга жойлаштирилган. Яна 7,42 миллиард доллар эса хорижий тижорат банкларида сақланмоқда.

Марказий банк шунингдек, қимматли қоғозларга инвестицияларни кўпайтирди. Уларнинг қиймати 300 миллион доллардан ортиқ ёки 42,7% га ошиб, 1,01 миллиард долларга етди. Шу тариқа, олтин-валюта захиралари таркибида акция ва облигациялар улуши илк бор 2% дан ошиб кетди.