Ўзбекистонга телефон импорти 900 мингдан ошди

Тошкент, Ўзбекистон (UzDaily.uz) — 2026 йил январь–февраль ойларида Ўзбекистонга жами 175,4 млн АҚШ доллари қийматида 909 951 дона мобил телефон импорт қилинди.

Таъминотлар 40 та хорижий давлатдан амалга оширилгани Ўзбекистон Миллий статистика қўмитаси маълумотларида қайд этилган.

Ўтган йилнинг шу даврига нисбатан импорт ҳажми 357,4 минг донага ёки бу 64,7 фоизга ошган.

Мобил телефонлар етказиб беришда асосий улуш Хитой ҳиссасига тўғри келди — ушбу мамлакатдан 704 353 дона қурилма олиб кирилган. Шунингдек, катта ҳажм Вьетнамдан — 183 996 дона телефонни ташкил этди. Ҳиндистондан 12 574 дона, Жанубий Кореядан 4 924 дона, Қирғиз Республикасидан эса 1 923  дона, Индонезиядан 1 582 дона телефон импорт қилинган. Бошқа давлатлар ҳиссасига 601 дона мобил қурилма тўғри келди.

Келтирилган маълумотлар ички бозорда мобил электроникага бўлган талаб барқарор ўсиб бораётганини ҳамда ташқи савдо таъминотлари географияси кенгаяётганини кўрсатади.