Тошкент, Ўзбекистон (UzDaily.uz) — Ўзбекистон Республикаси Президентининг 2023 йил 11 сентябрдаги ПФ-158-сон фармони билан тасдиқланган “Ўзбекистон — 2030” стратегиясининг 53-мақсадига мувофиқ 2030 йилга қадар авиақатновлар ҳажмини 4 баробарга ошириш белгиланган.

Мазкур топшириқ ижроси доирасида Транспорт вазирлиги делегациясининг навбатдаги учрашуви Индонезиянинг Жакарта шаҳрида бўлиб ўтди. Учрашувда Ўзбекистон ва Индонезия Республикалари авиация ҳукуматлари ўртасида икки томонлама ҳамкорлик ва ҳаво қатновларини янада ривожлантириш масалалари муҳокама этилди.

Учрашувда давомида Индонезия томонига Ўзбекистонда “Зиёрат туризми” ҳамда фуқаро авиация соҳасида амалга оширилаётган кенг кўламли ислоҳотлар ҳақида батафсил маълумот берилди. Шунингдек, Индонезия авиакомпаниялари вакиллари билан ўтказилган алоҳида учрашувларда “Умра плюс” дастурини ривожлантириш билан боғлиқ жиҳатлар кўриб чиқилди.

Музокаралар якунлари бўйича ҳаво қатнови бўйича икки томонлама келишувда илгари белгиланган авиакомпаниялар сонига қўйилган чекловларни бекор қилиш бўйича келишувга эришилди.

Шунингдек, Ўзбекистон авиакомпанияларининг янги йўналишлари аниқланди - Жакартадан ташқари Денпасар, Сурабая, Медан, Ёгякарта, Мажаленгка, Банда Аче, Танжунг Пандан ва Ломбок.

Томонлар ҳар бир мамлакат авиакомпаниялари учун парвозлар частотасини ҳафтасига 28 тага, яъни ҳар икки йўналишда 56 тагача оширишга келишиб олдилар.

Бундан ташқари, Индонезия томонидан тайинланган авиакомпаниялар учун Ўзбекистоннинг барча халқаро аэропортларига парвоз қилиш ҳуқуқини бериш бўйича келишувга эришилди.