Тошкент, Ўзбекистон (UzDaily.uz) — Инвесторлар ишончини ошириш, рақамли ечимларни жорий этиш ва самарали бозор назоратини ўрнатиш - Ўзбекистон фонд бозорини ривожлантиришнинг энг муҳим устувор йўналишларидир. Европа тикланиш ва тараққиёт банки ҳамда Корея фонд биржаси кўмагида уюштирилган делегациянинг Корея Республикасига ташрифи айнан шу масалаларга бағишланди.

Делегация таркибига Республика фонд биржаси "Тошкент" , Истиқболли лойиҳалар миллий агентлиги ва Фонд бозори ахборот-ресурс маркази вакиллари кирди.

Дастур доирасида иштирокчилар Осиёдаги энг илғор технологияларга эга ва ривожланган капитал бозорларидан бирининг фаолияти билан яқиндан танишдилар.Бозор назорати технологияларига алоҳида эътибор қаратилди. Иштирокчилар реал вақт режимида шубҳали битимларни аниқлаш, "ҳийла-найранг" хавфи камайтириш ва инвесторларни ҳимоя қилиш имконини берувчи автоматлаштирилган мониторинг тизимларини ўргандилар.

Корея биржаси ва Ўзбекистон ўртасидаги ҳамкорлик 2016 йилдан бери фаол ривожланиб келмоқда. Республика фонд биржаси "Тошкент"нинг 25 фоизлик улушига эга акциядори бўлган Корея фонд биржаси (КРХ) Ягона дастурий-техник комплексни жорий этишда сезиларли ёрдам кўрсатди. Бугунги кунда барча корпоратив қимматли қоғозлар билан боғлиқ биржа операциялари айнан шу комплекс асосида амалга оширилмоқда.

Олинган билим ва амалий тажриба Ўзбекистон капитал бозорини янада модернизация қилиш ва халқаро миқёсда интегратсиялашуви учун мустаҳкам пойдевор бўлади. Республика фонд биржаси "Тошкент" халқаро ҳамкорлар билан яқин ҳамкорликда шаффофлик, бозор назорати ва рақамли трансформациянинг жаҳон стандартларини жорий этиш бўйича ишларни изчил давом эттиради.