Тошкент, Ўзбекистон (UzDaily.uz) — 5-6 август кунлари «Ўзатом» агентлиги делегацияси Беларус Республикасида бўлиб турибди. Ташриф Ўзбекистон Республикаси Президенти Шавкат Мирзиёевнинг топшириғига биноан Беларуснинг АЭС қурилиши ва эксплуатация бўйича муваффақиятли тажрибасини ҳар томонлама ўрганиш, Ўзбекистондаги биринчи АЭС қурилишини амалга оширишда ундан фойдаланиш мақсадида ташкил этилди.

5 август куни «Ўзатом» делегацияси Беларус Республикаси энергетика вазири Денис Мороз билан учрашув ўтказди. Томонлар атом энергетикаси соҳасидаги ҳамкорликнинг асосий йўналишларини, жумладан, йирик атом электр станциясини энергия тизимига интеграция қилиш, жисмоний ҳимоя тизимини яратиш бўйича тажриба алмашиш, ишлатилган ядро ёқилғиси ва радиоактив чиқиндилар билан ишлаш, лойиҳаларни амалга оширишда жамоатчилик билан ҳамкорлик қилиш масалаларини муҳокама қилдилар.

Ўзбекистон томони мамлакатда атом электр станциясини қуриш лойиҳасини амалга ошириш босқичи ҳақида маълумот берди.

Беларус томони АЭС қурилиши ва эксплуатациясини таъминлаш учун инфратузилма қандай ташкил этилгани ҳақида маълумот берди, шунингдек, вахта шаҳарчасини ташкил этиш, АЭС ходимлари учун шаҳар қуриш ва ишлаб чиқаришни маҳаллийлаштириш тажрибаси билан ўртоқлашди.

“Биз Беларусни Сизнинг амалиётингиздан максимал даражада фойдаланган ҳолда асосий ҳамкорлардан бири сифатида кўриб чиқмоқдамиз. Биз учун миллий саноат корхоналари билан ишлаб чиқариш кооперацияси, етказиб беришни маҳаллийлаштириш, Беларус компанияларининг лойиҳадаги иштироки муваффақиятли йўлга қўйилган мамлакат тажрибаси муҳим. Бундай тажриба Ўзбекистонда атом энергетикасини қўллаб-қувватлашнинг саноат базасини шакллантиришда катта аҳамиятга эга”, — «Ўзатом» агентлиги директори Азим Ахмедхаджаев.

"Мамлакатимиз 2023 йилда қуввати 2400 мегаватт бўлган биринчи Беларус атом электр станциясини ишга туширди. Мамлакатда истеъмол қилинадиган барча электр энергиясининг қарийб 40 фоизи ушбу АЭСда ишлаб чиқарилади. Беларус АЭС қурилишида муваффақиятли ўзини кўрсатган компаниялар «Росатом» давлат корпорациясининг хориждаги қўшма лойиҳаларида фаол иштирок этмоқда. Ишончим комилки, беларуслар Ўзбекистонда АЭС қурилишда иштирок этишлари мумкин", — деди Беларус Республикаси энергетика вазири Денис Мороз.

Агентлик делегацияси «Беленерго» Давлат ишлаб чиқариш бирлашмаси диспетчерлик хизматининг марказий бошқарув шити фаолияти билан танишди. Марказий бошқарув шити Белоруснинг бутун ҳудудида электр энергиясини ишлаб чиқариш, узатиш ва тақсимлаш режимларини туну кун марказлаштирилган бошқарувини таъминлайди, республиканинг барча электр станциялари, подстанциялари ва энергия тизимларининг ҳаракатларини мувофиқлаштиради.

Ташриф дастурида Беларус АЭСга ташриф буюриш, БелАЭС ўқув-машғулот маркази билан танишиш, ҳамкорликнинг долзарб масалалари юзасидан икки томонлама музокаралар ва амалий маслаҳатлашувлар ўтказиш кўзда тутилган.