Тошкент, Ўзбекистон (UzDaily.uz) — Ўзбекистон Марказий банки маълумотларига кўра, 2025 йил июнь ойида банк секторидаги кредит портфели 1,3 фоизга ўсиб, 575,2 трлн сўмдан ошди. Шу билан бирга, сектор бўйича муаммоли кредитлар (NPL) улуши 4,1 фоиздан 3,8 фоизгача камайди.

Давлат банкларида бу кўрсаткич 4,1 фоиздан 3,8 фоизгача, хусусий банкларда эса 4,3 фоиздан 3,9 фоизгача пасайди.

Энг сезиларли ўзгаришлар қуйидаги банкларда кузатилди: «Ипотека-банк»да муаммоли кредитлар улуши 9,5 фоиздан 6,6 фоизгача, «Гарант банк»да 18,9 фоиздан 16,7 фоизгача, «Зираат банк»да 6,3 фоиздан 4,6 фоизгача, «Бизнесни ривожлантириш банки»да эса 7,8 фоиздан 6,1 фоизгача камайди.

Шунингдек, «Агробанк»да 4,2 фоиздан 3,8 фоизгача, «Асакабанк»да 4,8 фоиздан 4,5 фоизгача, «Алоқабанк»да 2,7 фоиздан 2,4 фоизгача ва «Ориент Финанс банк»да 2,2 фоиздан 1,9 фоизгача тушиши қайд этилди.

Шу билан бирга, айрим банкларда муаммоли кредитлар улушининг ўсиши кузатилди. Жумладан, «Пойтахт банк»да бу кўрсаткич 0 фоиздан 3,2 фоизгача, «Smart банк»да 0 фоиздан 1,3 фоизгача, «Анор банк»да 3,1 фоиздан 3,8 фоизгача, «Инвест Финанс банк»да 2,3 фоиздан 2,8 фоизгача, «TBC Bank»да 3,7 фоиздан 4,1 фоизгача ва «Давр банк»да 3,0 фоиздан 3,3 фоизгача кўтарилди.