Тошкент, Ўзбекистон (UzDaily.uz) — 2025 йил 1 сентябрдан бошлаб Ўзбекистонда юридик шахсларга патрул-пост хизмати (ППХ) билан жамоат тартиби ва хавфсизлигини таъминлаш мақсадида, одамлар кўп тўпланадиган жойларда, шартнома тузиш имконияти берилади. Бу ҳақда Вазирлар Маҳкамаси томонидан тегишли қарор қабул қилинди.

Таъкидланишича, ушбу чора митинг, намойиш ва бошқа оммавий тадбирларга нисбатан қўлланилмайди.

Аризаларни ЯИДХП орқали, давлат хизматлари марказлари ёки бевосита ППХ бўлинмаларига оғзаки ёки ёзма равишда топшириш мумкин бўлади. Мурожаат рўйхатга олингандан сўнг ходимлар патруллик ташкил этилиши режалаштирилган ҳудудни ўрганиб чиқади.

Текширув якунлари бўйича ҳимояланадиган ҳудуднинг чегаралари, зарур ходимлар сони, постлар жойлашуви ва иш жараёни хусусиятлари кўрсатилган акт тузилади. Шу асосда шартнома тайёрланади.

Кўрсатиладиган хизматлар учун тўлов миқдори Иқтисодиёт ва молия вазирлиги билан келишилади.