Toshkent, O‘zbekiston (UzDaily.uz) — So‘nggi yillarda O‘zbekiston xalqaro biznes uchun jozibador manzilga aylanib bormoqda va shu haftada Yevropaning yetakchi premium erkak va ayollar kiyim brendlaridan birining tashrifi buning yorqin tasdig‘idir. GUZ partners loyihasi doirasida va Gesamtmasche hamkorligida ARTIFEX CO.Ltd kompaniyasi vakili Volf-Diter Lang O‘zbekistonga mahalliy to‘qimachilik korxonalari faoliyati bilan tanishish va hamkorlik imkoniyatlarini baholash maqsadida keldi.

“O‘zto‘qimachiliksanoat” uyushmasi ko’magida erkaklar va ayollar kiyimlari ishlab chiqaruvchi 15 dan ortiq yirik korxonalarga tashrif uyushtirildi. Tashrif chog‘ida Yevropa kompaniyasi vakili “IDEAL”, “Molto Caldo”, “ADIM”, “FAZMAN” kabi brendlar “Mustang Textile”, “Sadokat Sanoat Service”, “Yozvon Textile”, “Amira Textile” kabi ishlab chiqaruvchilar ish jarayoni bilan yaqindan tanishdi.

“Artifex” brendi vakili O‘zbekiston kompaniyalarining yuksak salohiyatini qayd etib, uzoq muddatli hamkorlik aloqalarini o‘rnatishdan manfaatdorligini bildirdi. Hamkorlikning turli jihatlari, jumladan, qo‘shma loyihalar, texnologiyalar almashinuvi va yangi dizayn ishlanmalari muhokama qilindi. Ushbu brend mahalliy to‘qimachilik mahsulotlari eksport salohiyatini kengaytirish uchun O‘zbekiston kompaniyalariga uzoq muddatli buyurtmalar berish imkoniyatlarini ko‘rib chiqmoqda. Ushbu tashabbus moda ishlab chiqarish markazi sifatida O‘zbekistonga qiziqish ortib borayotganini ta’kidlaydi va hamkorlik uchun yangi marralarni ochadi. Ushbu hamkorlik natijasida ham ichki, ham xalqaro bozorlarda talabga ega noyob kolleksiyalar yaratilishi kutilmoqda.

Bunday yetakchi brendlarning O‘zbekistonga tashrifi to‘qimachilik sanoatidagi aloqalarni mustahkamlash yo‘lidagi muhim qadam bo‘ldi. Bu boradagi boy salohiyati va an’analariga ega O‘zbekiston o‘z biznesini yangi bozorlarda kengaytirishga intilayotgan xorijiy kompaniyalar uchun ishonchli hamkorga aylanishi mumkin.