Toshkent, O‘zbekiston (UzDaily.uz) — Yevropa Ittifoqi Rossiyaga qarshi 16-yirik sanksiyalar paketi doirasida O‘zbekiston kompaniyalarini sanksiyalar ro‘yxatiga kiritdi.

Yevropa Ittifoqi Kengashi Rossiya, Xitoy, Qozog‘iston, Hindiston, Singapur, Turkiya, BAA va O‘zbekistondan 53 tashkilotni sanksiyalardan qochishda gumon qilingan subyektlar ro‘yxatiga kiritdi. Bayonotda O‘zbekistondan nechta kompaniya ro‘yxatga kiritilgani va ularning nomlari ochiqlanmagan.

Sanksiyalar ikki maqsadli tovarlar va texnologiyalar hamda Rossiya mudofaa sektori rivojiga hissa qo‘shishi mumkin bo‘lgan mahsulotlar uchun eksport cheklovlarini kuchaytirishni ko‘zda tutadi.

Yevropa Ittifoqi maʼlumotlariga ko‘ra, sanksiyalar ro‘yxatiga kiritilgan kompaniyalar savdo cheklovlarini chetlab o‘tish yoki Rossiya harbiy amaliyotlarida ishlatilayotgan dron va raketa komponentlarini yetkazib berishga aloqadorlikda gumon qilinmoqda.