Toshkent, O‘zbekiston (UzDaily.uz) — Har oyda minglab yo‘lovchi tashuvlarini amalga oshirayotgan 600 dan ortiq haydovchi xizmat bilan hamkorlik qilmoqda.

2 may kuni Toshkentda “Sharoit Plyus” nodavlat notijorat tashkiloti va O‘zbekiston Respublikasi Prezidenti huzuridagi Milliy ijtimoiy himoya agentligi hamkorligida Uchinchi Inklyuziv biznes-forum bo‘lib o‘tdi. Tadbir doirasida biznes vakillari, davlat idoralari, xalqaro va jamoat tashkilotlari inklyuziv bandlik amaliyoti hamda korporativ ijtimoiy mas’uliyatni oshirish masalalarini muhokama qilish uchun bir joyga jam bo‘lishdi.

Forum spikerlari qatorida Yandex Go yo‘lovchi tashish xizmati biznesni rivojlantirish rahbari Timur Aliyev ham ishtirok etdi. U kompaniyaning eshitish bo‘yicha nogironligi bor haydovchilar bilan hamkorlik qilish uchun yaratilgan shart-sharoitlar bo‘yicha tajribasi bilan o‘rtoqlashdi.

Bugungi kunda xizmat bilan 600 dan ortiq bunday haydovchi hamkorlik qilmoqda. Ulardan taxminan 150 nafari har oyda 22 000 dan ortiq buyurtmani amalga oshiradi. Asosiy ko‘rsatkichlar — reyting, buyurtmalar soni va daromad darajasi bo‘yicha, ularning natijalari platformadagi boshqa hamkorlarnikidan farq qilmaydi.

Safarlarni xavfsiz va qulay qilish maqsadida Yandex Go ilova va jarayonlarni moslashtirdi. Ovozli ogohnomalar vibratsiya va ekran yorig‘iga almashtirildi, qo‘ng‘iroqlar o‘chirildi, haydovchi va yo‘lovchi o‘rtasidagi muloqot chat orqali amalga oshiriladigan qilindi. 

Bundan tashqari, ilova orqali yo‘lovchi haydovchi eshitmasligini bilib oladi va shu zahotiyoq yozishma boshlash imkoniga ega bo‘ladi. Ekranda buyurtmaning o‘ziga xos xususiyatlari haqida ma’lumot va qanday qilib haydovchi bilan qulay muloqot qilish bo‘yicha tavsiyalar ham chiqadi.

Ayni paytda, boshqa buyurtmalardan farqli o‘laroq, bu xizmatda chat safar tugagunga qadar faol bo‘lib qoladi.

Shuningdek, haydovchilar taksoparklarda maxsus chexollar va yo‘lovchilar uchun yo‘l-yozuvlari aks etgan kartochkalar olishlari mumkin — bu safar paytida muloqotni yanada yengillashtiradi.

Kompaniya vakillarining ta’kidlashicha, bunday o‘zgarishlar turli foydalanuvchi ssenariylarini hisobga oladi va xizmatni avval tushunish yoki foydalanish qiyin bo‘lgan kishilar uchun ham qulay va ochiq qilib beradi.