Toshkent, O‘zbekiston (UzDaily.uz) — Bugun, 8 aprel kuni “Termiz Xalqaro savdo markazi”da “Made in Uzbekistan” ko‘rgazma-yarmarkasi tantanali ravishda ochildi. Unda O‘zbekistonning turli hududlaridan 60 dan ortiq kompaniya ishtirok etmoqda.

Ochilish marosimida O‘zbekiston Savdo-sanoat palatasi raisi o‘rinbosari Dilshod Rasulov hamda Surxondaryo viloyati hokimining birinchi o‘rinbosari Sherzod Rajabov o‘z nutqlari bilan ishtirok etdi.

Ko‘rgazmada to‘qimachilik, charm-poyabzal, oziq-ovqat sanoati, maishiy kimyo, farmatsevtika va qurilish materiallari va boshqa sohalarda faoliyat yurituvchi korxonalar o‘z mahsulotlarini namoyish etmoqda.

Ushbu tadbir O‘zbekiston ishlab chiqaruvchilari uchun Afg‘oniston bozoriga chiqish, yangi hamkorlar topish va o‘zaro manfaatli shartnomalar tuzishda muhim maydon hisoblanadi.

Ko‘rgazma-yarmarka doirasida biznes uchrashuvlar, taqdimotlar va savdo muzokaralari ham tashkil etiladi. Afg‘oniston tadbirkorlari tomonidan O‘zbekiston mahsulotlariga katta qiziqish bildirilmoqda.