Toshkent, O‘zbekiston (UzDaily.uz) — Eron Tashqi ishlar vaziri Abbos Arakchiy AQSH Prezidenti Donald Trampning Tehron va Tel-Aviv o‘rtasida go‘yoki o‘t ochishni to‘xtatish bo‘yicha kelishuvga erishilgani haqidagi bayonotini rad etdi.

O‘zining X (avvalgi Twitter) ijtimoiy tarmog‘idagi sahifasida eʼlon qilingan bayonotida Arakchiy hozirgi vaqtda hech qanday rasmiy sulh yoki harbiy harakatlarni to‘xtatish bo‘yicha kelishuv mavjud emasligini taʼkidladi.

Uning aytishicha, Eron tomoni faqatgina Isroilning tajovuzkor harakatlari zudlik bilan to‘xtatilgan taqdirdagina javob zarbalarini to‘xtatishga tayyor.

«Agar Isroil rejimi Eron xalqiga nisbatan noqonuniy tajovuzini Tehron vaqti bilan soat 4:00 dan kechikmay to‘xtatsa, biz javob chora-tadbirlarini davom ettirmaymiz», — dedi Arakchiy.

Shu bilan birga, TIV rahbari harbiy operatsiyalarni to‘xtatish bo‘yicha hozircha yakuniy qaror qabul qilinmaganini ham qo‘shimcha qildi.

Keyinroq u maʼlum qildiki, Eron qurolli kuchlari belgilangan muddat — Tehron vaqti bilan soat 4:00 gacha harbiy harakatlarni davom ettirgan.

Bu bayonotlar Donald Tramp bir necha soat avval bergan va Isroil hamda Eron o‘rtasida go‘yoki 12 kunlik qurolli to‘qnashuvni rasman tugatishga olib keladigan sulh kelishuvi tuzilganini iddao qilgan bayonoti ortidan yangradi.