Toshkent, O‘zbekiston (UzDaily.uz) — Oliy Majlis Senatidagi Fan, taʼlim va sog‘liqni saqlash masalalari qo‘mitasi raisi Bahrom Abdullayev Oliy taʼlim, fan va innovatsiyalar vaziri Kong‘ratboy Sharipov nomiga senatorlik so‘rovi yubordi.

Buning sababi — fuqarolardan kelib tushayotgan ko‘plab murojaatlar bo‘lib, ular bir vaqtda ikki oliygohda tahsil olish imkoniyati mavjud emasligi haqida shikoyat qilishmoqda. Xususan, kunduzgi va masofaviy taʼlim, yoki davlat va xususiy taʼlim muassasalarida parallel o‘qish imkoniyati mavjud emasligi qayd etilmoqda.

Senator taʼkidlashicha, 2017 yildan buyon mamlakatda oliy taʼlim tizimida keng ko‘lamli islohotlar olib borilmoqda: oliygohlar soni 77 tadan 203 tagacha, talabalar qamrovi 9% dan 42% gacha oshgan. Shunga qaramay, qonunchilikda taʼlimning ikkinchi shaklini bir vaqtda olishga to‘sqinlik qiladigan cheklovlar saqlanib qolmoqda.

Xususan, 2017 yi l 20 iyundagi Vazirlar Mahkamasining 393-sonli qaroriga muvofiq, talabani HEMIS tizimida qayta ro‘yxatdan o‘tkazishga ruxsat berilmaydi, bu esa bir vaqtda ikki oliygohda o‘qish imkonini istisno qiladi. Senator taʼkidlashicha, AQSH, Yevropa Ittifoqi davlatlari, Rossiya va Qozog‘istonda bunday to‘siqlar mavjud emas.

Shu munosabat bilan, u vazirlikdan fuqarolarning bir vaqtda ikki oliy taʼlim muassasasida o‘qishi mumkin yoki mumkin emasligi bo‘yicha rasmiy tushuntirish berishini so‘radi.