Toshkent, O‘zbekiston (UzDaily.uz) — O‘zbekiston Respublikasi Prezidentining yordamchisi Saida Mirziyoyeva Yevropa Ittifoqining Markaziy Osiyo bo‘yicha maxsus vakili Eduards Stiprays bilan uchrashuv o‘tkazdi.

Suhbat davomida tomonlar O‘zbekiston va Yevropa Ittifoqi o‘rtasidagi hamkorlikni yana-da chuqurlashtirish, shuningdek, Markaziy Osiyo mintaqasida o‘zaro aloqalarni kengaytirish istiqbollarini muhokama qildilar.

Alohida eʼtibor ayollar tadbirkorligini qo‘llab-quvvatlash, taʼlim tashabbuslarini rivojlantirish, suv resurslaridan oqilona foydalanish va mintaqalararo aloqalarni mustahkamlash masalalariga qaratildi.

Saida Mirziyoyeva, o‘z navbatida, sheriklikni rivojlantirishda ochiq va konstruktiv yondashuvning ahamiyatini taʼkidlab, shunday dedi:

«Janob Stipraysning mintaqamizda to‘plagan kasbiy tajribasi o‘zaro ishonchni mustahkamlash va umumiy tashabbuslarni ilgari surishda qo‘shimcha turtki bo‘lishiga ishonamiz».

Uchrashuv o‘zaro tushunish va amaliy natijalarga intilish ruhida o‘tdi.