Toshkent, O‘zbekiston (UzDaily.uz) — “Roskachestvo” va O‘zbekiston Ilmiy sinov va sifat nazorati markazi (“O‘ztest”) o‘zaro anglashuv memorandumini imzoladilar. Bu haqda “Roskachestvo” matbuot xizmati xabar bermoqda.

Ushbu memorandum Rossiya va O‘zbekiston o‘rtasidagi iqtisodiy aloqalarni mustahkamlash, savdo jarayonlarini soddalashtirish va ekologik toza mahsulotlarga isteʼmolchilar ishonchini oshirishga qaratilgan.

Kelishuvning asosiy maqsadi — organik ishlab chiqarish sohasida milliy standartlarni uyg‘unlashtirishdan iborat. Bu esa kelgusida muvofiqlik sertifikatlarini o‘zaro tan olish imkonini beradi, maʼmuriy to‘siqlarni kamaytiradi va ikki davlat biznesi uchun yangi imkoniyatlarni ochadi.

Hujjatga “Roskachestvo” rahbari o‘rinbosari Aleksandr Chumak va “O‘ztest” direktori Javlon Qattaho‘jayev imzo chekdi.

Kelishuv doirasida mutaxassislar o‘rtasida tajriba almashish, seminarlar, treninglar va standartlashtirish hamda sertifikatlashtirish sohalarida konferensiyalar o‘tkazish rejalashtirilgan. Bu hamkorlik o‘zbek mutaxassislariga xalqaro amaliyotlarga chuqurroq integratsiyalashishga, rossiyalik ekspertlarga esa Markaziy Osiyo mutaxassislari bilan muloqotni mustahkamlashga xizmat qiladi.

Shuningdek, hujjat qonunchilik yangiliklari va texnik hujjatlar bo‘yicha axborot almashinuvini ham nazarda tutadi. Bu esa talablar va jarayonlarning shaffofligini taʼminlaydi.

Alohida eʼtibor laboratoriya sinovlari sohasidagi hamkorlikka qaratilgan. O‘zbekistondagi laboratoriyalar Rossiyada kvalifikatsiyani tasdiqlash uchun oziq-ovqat, to‘qimachilik hamda atir va kosmetika mahsulotlari bo‘yicha laboratoriyalararo taqqoslash sinovlarida ishtirok etishi mumkin bo‘ladi. "Bu tadqiqotlarning aniqligini oshiradi va uzoq muddatda ikki mamlakat uchun yagona metodologik bazani yaratishga yordam beradi", — deyiladi “Roskachestvo” xabarida.