Toshkent, O‘zbekiston (UzDaily.uz) — Shu yilning 7-avgust kuni O‘zbekiston Respublikasi Investitsiyalar, sanoat va savdo vazirligida vazir o‘rinbosari Akram Aliev “Rokosan” kompaniyasining tijorat direktori Yaroslav Kotsak bilan uchrashdi.

Suhbat davomida kompaniyaning mamlakatimizda ekologik barqaror qishloq xo‘jaligi texnologiyalarini, xususan, yuqori samarali organik o‘g‘itlar ishlab chiqarish sohasini faol rivojlantirishdagi muvaffaqiyatli faoliyati e’tirof etildi.

Tomonlar loyihalar va tashabbuslarning amalga oshirish sur’atlarini, ularning iqtisodiy samaradorligi va ijtimoiy ahamiyatini yuqori baholadilar. Muzokaralar yakunida o‘zaro hamkorlikni yanada mustahkamlash, istiqbolli yangi yo‘nalishlarni o‘rganish hamda aniq maqsadli natijalarga erishish uchun doimiy muloqotni qo‘llab-quvvatlash borasida kelishuvga erishildi.