Toshkent, O‘zbekiston (UzDaily.uz) — Raqamli texnologiyalar vaziri Sherzod Shermatov Osiyo taraqqiyot bankining bozorlar rivojlanishi va davlat-xususiy sheriklik ofisi rahbari Kleo Kavavaki hamda OTBning O‘zbekistondagi doimiy vakolatxonasi mamlakat amaliyotlari rahbari Mirzo Iskandar G‘ulomov bilan uchrashdi. Uchrashuvda O‘zbekistonning raqamli iqtisodiyotini rivojlantirish bo‘yicha hamkorlik masalalari muhokama qilindi.

Muzokaralarda davlat-xususiy sheriklik loyihalarini kengaytirish, OTB bilan hamkorlikni mustahkamlash va raqamli infratuzilmani modernizatsiya qilish bo‘yicha masalalarga alohida e’tibor qaratildi.

Uchrashuv davomida axborot texnologiyalari sohasida amalga oshirilayotgan tashabbuslar, kelgusi rivojlanish strategiyalari, soliq imtiyozlari hamda yosh mutaxassislar uchun yuqori maoshli texnologik ish o‘rinlarini yaratishga qaratilgan dasturlar muhokama qilindi.

Shuningdek, axborot texnologiyalari bo‘yicha ta’limni qo‘llab-quvvatlash, startap-tashabbuslar va raqamli xizmatlarni mamlakat hududlariga keng yoyish bo‘yicha hamkorlik imkoniyatlari ko‘rib chiqildi.

OTB vakillariga Uzinfocom – yagona raqamli texnologiyalar integratori tomonidan ishlab chiqilgan loyihalar taqdimoti o‘tkazildi. Ushbu loyihalar O‘zbekistonning raqamli transformatsiyasini jadallashtirishda muhim ahamiyat kasb etishi ta’kidlandi.