Toshkent, O‘zbekiston (UzDaily.uz) — O‘zbekiston Respublikasi Prezidenti Administratsiyasida yangi kadr tayinlovlari amalga oshirildi. Bu haqda davlat rahbarining matbuot kotibi Sherzod Asadov maʼlum qildi.

Prezident farmoniga muvofiq, Bekzot Mardonovich Mavlonov O‘zbekiston Prezidenti yordamchisi lavozimiga tayinlandi. Shu munosabat bilan u huquqiy ekspertiza va kompleks tahlil masalalari bo‘yicha Prezident maslahatchisi lavozimidan ozod etildi. Avvalroq u Prezident Administratsiyasining huquqiy ekspertiza va kompleks tahlil departamentini boshqargan, shuningdek, davlat maslahatchisi o‘rinbosari va bosh prokuror o‘rinbosari sifatida faoliyat yuritgan.

Yana bir tayinlov — Aziz Yuldashevich Magrupov Prezidentning tashqi investitsiyalar masalalari bo‘yicha maslahatchisi etib tayinlandi. U 2018 yildan buyon Prezident yordamchisi lavozimida ishlab kelayotgan edi va yangi tayinlov munosabati bilan mazkur vazifadan ozod etildi.

Avval xabar berilganidek, Prezident yordamchisi lavozimida ishlagan Saida Mirziyoyeva Administratsiyada yangi joriy etilgan lavozim — Prezident Administratsiyasi rahbari etib tayinlandi.

Bundan tashqari, Komil Allamjonov Saida Mirziyoyevaning mustaqil maslahatchisi etib tayinlandi. U innovatsion iqtisodiyotni rivojlantirish, investitsiyalarni jalb etish, so‘z erkinligini taʼminlash va mustaqil ommaviy axborot vositalarini qo‘llab-quvvatlash kabi strategik yo‘nalishlarda jamoatchilik asosida maslahat beradi.

O‘zbekiston Respublikasi Prezidenti Shavkat Mirziyoyevning farmoniga binoan, Prezident Administratsiyasining bir qator xodimlari egallab turgan lavozimlaridan ozod etildi.

Saidlaziz Saidkarimov Prezident Administratsiyasi Kontrol inspeksiyasi boshlig‘i lavozimidan boshqa ishga o‘tishi munosabati bilan ozod etildi.

Shuningdek, Utkirjon Qodirov — Administratsiyaning hududlar bilan hamkorlik va tahliliy materiallar tayyorlash bo‘yicha departamenti rahbari lavozimidan, hamda Jahongir Ibrohimov — rejalash va axborot bilan taʼminlash departamenti rahbari o‘rinbosari lavozimidan shu asosda ozod qilindi.