Toshkent, O‘zbekiston (UzDaily.uz) — Qozondagi O‘zbekiston Bosh konsulxonasi maʼlumotiga ko‘ra, Rossiyaning Perm o‘lkasida yuz bergan yo‘l-transport hodisasi natijasida O‘zbekiston fuqarolari halok bo‘ldi.

Diplomatik vakolatxona maʼlumotiga ko‘ra, hodisa 22 fevral kuni soat 06:00 atrofida Osinsk tumanida sodir bo‘lgan. O‘zbekiston davlat raqamiga ega Lada Largus (75V435NA) avtomobili SIMAZ avtobusi bilan to‘qnashgan.

YTH oqibatida uch kishi halok bo‘ldi: E. F. A. va J. A. Sh. hodisa joyida vafot etgan, O. A. M. esa kasalxonada jarohatlar sababli vafot etgan. Shuningdek, S. B. I., R. M. A. va K. F. J. turli darajadagi jarohatlar olgan va Osinsk markaziy tuman kasalxonasiga yotqizilgan.

Perm o‘lkasi Davlat avtoinspeksiyasi dastlabki maʼlumotlariga ko‘ra, Lada Largus haydovchisi ikkinchi darajali yo‘ldan harakatlanib, tartibga solinmagan chorrahada bosh yo‘lda ketayotgan avtobusga yo‘l bermagan va oqibatda to‘qnashuv sodir bo‘lgan.

Hodisa yuzasidan tekshiruv ishlari olib borilmoqda.

Qozondagi O‘zbekiston Bosh konsulxonasi vaziyatni nazoratda ushlab turibdi. «Marhumlarning jasadlarini yurtga qaytarish jarayoni yakunlandi, jabrlanuvchilarga zarur tibbiy yordam ko‘rsatilmoqda», — deyiladi konsulxona xabarida.

Qo‘shimcha maʼlumot olish uchun Bosh konsulxona bilan bog‘lanish mumkin:

+7−843 526−55−63

+7−843 526−55−64

+7−843 526−55−65