Toshkent, O‘zbekiston (UzDaily.uz) — “O‘zbekneftgaz” kompaniyasi Rossiyaning “Tatneft”, Qozog‘istonning “QazMunayGaz” va Ozarbayjonning SOCAR kompaniyalari bilan raqamli texnologiyalar va sanoat xavfsizligi sohasida hamkorlik to‘g‘risida to‘rt tomonlama memorandumlar imzoladi.

Imzolash marosimi Boku shahrida bo‘lib o‘tgan "Energetika sohasida raqamlashtirish, sanoat xavfsizligi va xaridlar" xalqaro konferensiyasi doirasida o‘tkazildi.

Hujjatga “Tatneft” bosh direktori Nail Maganov, “QazMunayGaz” boshqaruvi raisi Asxat Xasenov, “O‘zbekneftgaz” boshqaruvi raisi Bahodirjon Sidiqov va SOCAR prezidenti Rovshan Nadjaf imzo chekdi.

Memorandumlar raqamli yechimlarni ishlab chiqish va joriy etish bo‘yicha tajriba almashish, shuningdek, texnogen halokatlarning oldini olish va ularning oqibatlarini bartaraf etish sohasida hamkorlikni nazarda tutadi.