Toshkent, O‘zbekiston (UzDaily.uz) — “O‘zbekneftgaz” AJ va “Schlumberger” Ustyurt viloyatidagi konlarni boshqarish bo‘yicha shartnoma imzoladi“O‘zbekneftgaz” AJ va Schlumberger kompaniyasi o‘rtasida Ustyurt mintaqasidagi konlarni boshqarish bo‘yicha kelishuv imzolandi.

2025 yil 13–15 may kunlari Toshkent shahrida bo‘lib o‘tayotgan 27-Xalqaro “O‘zbekiston neft va gaz – OGU 2025” ko‘rgazma va konferensiyasi doirasida “O‘zbekneftgaz” aksiyadorlik jamiyati va xalqaro neftservis kompaniyasi Schlumberger (SLB) o‘rtasida Ustyurt mintaqasidagi konlarni boshqarish bo‘yicha kelishuv (Field Management Agreement) imzolandi.

Kelishuv doirasida o‘zaro hamkorlikning yangi formati — qo‘shma loyihani boshqaruv guruhini (Joint Project Management Team) tashkil etish nazarda tutilgan. Ushbu guruh neft va gaz resurslarini boshqarishda zamonaviy texnologiyalarni joriy etish, samaradorlikni oshirish hamda barqaror rivojlanish bo‘yicha strategik vazifalarni amalga oshirish uchun javobgar bo‘ladi.

Kelishuvning imzolanishi “O‘zbekneftgaz” AJ va SLB kompaniyasi o‘rtasidagi hamkorlikni mustahkamlash yo‘lidagi muhim qadam bo‘ldi. Yangi format orqali qarorlar tezkor qabul qilinishi, dunyodagi eng ilg‘or tajribalar qo‘llanilishi hamda texnologiya va bilimlar transferiga yordam berilishi kutilmoqda.