Toshkent, O‘zbekiston (UzDaily.uz) — O‘zbekistonda yirik sanoat korxonalari uchun energiya resurslarini isteʼmol qilish normativlari joriy etiladi, bu esa xarajatlarni 5–10% ga kamaytirish imkonini beradi. Bu haqda Prezident Shavkat Mirziyoyev raisligida o‘tkazilgan yig‘ilishda maʼlum qilindi.

Joriy yilda 1,6 milliard kubometr tabiiy gaz va 3,5 milliard kVt·soat elektr energiyasini tejash rejalashtirilgan. Shu munosabat bilan korxona va tashkilotlarga energiya samaradorligini oshirishga qaratilgan ilmiy asoslangan tavsiyalar beriladi.

Ijtimoiy muassasalarga zamonaviy qozonxonalar o‘rnatiladi, bu esa joriy yilning o‘zida gaz isteʼmolini 5 million kubometrga, elektr energiyasi isteʼmolini esa 15 million kVt·soatga kamaytirish imkonini yaratadi.

Ko‘p qavatli uy-joylarda issiqlik izolyatsiyasini yaxshilash rejalashtirilgan. Shu bilan birga, aholiga quyosh panellari va geliokollektorlar o‘rnatish uchun imtiyozli kreditlar taqdim etiladi. Shu bilan bir vaqtda, yapon tajribasiga asoslangan energiya tejamkorligi bo‘yicha taʼlim dasturi amalga oshiriladi.