Toshkent, O‘zbekiston (UzDaily.uz) — Qo‘shni mamlakatlarning go‘sht mahsulotlarini eksport qilishda joriy qilgan cheklovlari O‘zbekistonda go‘sht narxining oshishiga sabab bo‘ldi. Bu haqda 2025 yilning birinchi choragidagi pul-kredit siyosatiga bag‘ishlangan Markaziy bank hisobotida aytilgan.

2024 yil kuzida Qozog‘iston 2024 yil 14 sentyabrdan 2025 yil 14 martigacha yirik va mayda shoxli qoramollarni (matka zotli) eksport qilishga yarim yillik taqiq joriy etgan edi. Keyinroq, 9 apreldan boshlab, Qozog‘iston Qishloq xo‘jaligi va Moliya vazirliklari ushbu cheklovni yana olti oyga uzaytirdi.

Qirg‘iziston esa 2025 yil 31 yanvardan boshlab yirik va mayda shoxli qoramollar hamda otlarni uchinchi davlatlarga eksport qilishni vaqtincha to‘xtatgan.

O‘zbekiston Davlat statistika qo‘mitasi maʼlumotlariga ko‘ra, 2025 yil yanvar–mart oylarida O‘zbekiston go‘sht va go‘sht mahsulotlari import hajmini 65,1% ga oshirib, $138,1 mlnga yetkazgan.

Markaziy bank taʼkidlashicha, qo‘shni davlatlar eksportga qo‘ygan cheklovlar va import go‘shti narxining oshishi mahalliy bozorda narxlarning ko‘tarilishiga olib kelgan.

2025 yil mart oyida go‘sht mahsulotlari narxi 6,1%ga, yillik hisobda esa 21,6%ga oshdi. Ammo aprelda Davlat statistika qo‘mitasi maʼlum qilishicha, go‘sht narxining oylik o‘sishi sekinlashgan: go‘sht (file bundan mustasno) 1,84%, qo‘y go‘shti esa 1,83%ga qimmatlashgan.

Qishloq xo‘jaligi vazirligi narxlar o‘sishiga munosabat bildirib, bu holat hududiy tendensiyalar doirasida ekanini va jahon bozoridagi o‘zgarishlar fonida nisbatan barqaror ekanini taʼkidladi.

Vazirlik maʼlum qilishicha, O‘zbekiston Markaziy Osiyo mamlakatlari orasida Qirg‘izistondan so‘ng go‘shtga nisbatan eng arzon narxlarga ega.