Toshkent, O‘zbekiston (UzDaily.uz) — O‘zbekistonda davlat xizmatchilari mulki va daromadlarini deklaratsiya qilish to‘g‘risida qonun ishlab chiqiladi. Mazkur tashabbus O‘zbekiston Prezidenti Shavkat Mirziyoyev tomonidan imzolangan tegishli farmonga asosan amalga oshiriladi.

Hujjatda deklaratsiyalarni to‘ldirish va tekshirish tartibini joriy etish, shuningdek, jinoiy yo‘l bilan topilgan daromadlarni legallashtirish mezonlarini xalqaro standartlarga moslashtirish belgilangan. Joriy yil iyun oyi oxiriga qadar korrupsiyaviy jinoyatlar ro‘yxati qayta ko‘rib chiqilib, javobgarlik choralari kuchaytiriladi.

Bundan tashqari, mamlakatda davlat xizmatchilari uchun yagona reyestr yaratiladi. Bu tizim ishga qabul qilishda oshkoralikni taʼminlash, nomzodlarning bilim, tajriba va malakasini baholashni soddalashtirish, shu jumladan raqamli yechimlardan foydalanish orqali amalga oshiriladi.

Prezident shuningdek, mahalla va ayrim korxonalar darajasida soliq nazoratini kuchaytirish vazifasini qo‘ydi. Ushbu choralar yashirin iqtisodiyotni qisqartirish va soliq organlarining samaradorligini oshirishga qaratilgan.