Toshkent, O‘zbekiston (UzDaily.uz) — 2025 yil 1 iyul holatiga ko‘ra, O‘zbekistonda 5,5 milliondan ziyod o‘zini o‘zi band qilgan fuqaro ro‘yxatdan o‘tgan. Bu o‘tgan yilning shu davriga nisbatan 56% ga ko‘p. Bu haqda Davlat soliq qo‘mitasi maʼlum qildi.

Eng ko‘p o‘zini o‘zi band qilganlar — 2,2 million nafardan ortiq fuqaro — maishiy xizmat ko‘rsatish sohasida faoliyat yuritmoqda. Shuningdek, 1,5 millionga yaqin kishi qishloq xo‘jaligida ishlamoqda.

2025 yil boshidan buyon taksi xizmatlari ko‘rsatuvchi o‘zini o‘zi band qilganlar soni keskin o‘sib, 184,2 ming nafarga ko‘paydi va jami 777,1 ming nafarga yetdi.

Eng tez o‘sish axborot va kommunikatsiya texnologiyalari sohasida kuzatilmoqda. Bu yo‘nalishda bir yil ichida o‘zini o‘zi band qilganlar soni 92,3% ga ko‘payib, 168,2 ming nafarga yetdi.

Hududlar kesimida esa eng ko‘p o‘zini o‘zi band qilganlar Samarqand viloyatida ro‘yxatdan o‘tgan — 593,2 ming kishi. Ikkinchi o‘rinda Toshkent shahri — 584,6 ming, uchinchi o‘rinda Toshkent viloyati — 538,8 ming o‘zini o‘zi band qilgan fuqaro qayd etilgan.