Toshkent, O‘zbekiston (UzDaily.uz) — Joriy yil 21-iyulda O‘zgidromet agentligi direktori Sh.Khabibullayev boshchiligida Birlashgan Arab Amirliklarining (BAA) Gidrometeorologiya milliy markazi rahbari va Jahon meteorologiya tashkiloti (WMO) prezidenti lavozimida faoliyat yuritayotgan Dr. Abdulla Ahmed Al Mandous boshchiligidagi delegatsiya O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligida rasmiy tashrif bilan bo‘ldi.

Mazkur tashrif doirasida tomonlar O‘zbekiston Respublikasi va Birlashgan Arab Amirliklari o‘rtasida gidrometeorologiya, iqlim o‘zgarishi monitoringi, atrof-muhitni muhofaza qilish, ilmiy-tadqiqot ishlari va kadrlar salohiyatini oshirish yo‘nalishlarida hamkorlikni rivojlantirish masalalarini muhokama qildilar.

Uchrashuv yakunida O‘zgidromet agentligi va BAA Gidrometeorologiya milliy markazi o‘rtasida o‘zaro anglashuv memorandumi imzolandi.