Toshkent, O‘zbekiston (UzDaily.uz) — O‘zbekistondan Mo‘g‘ulistonga avtomobil orqali birinchi pilot yuk tashuvi muvaffaqiyatli amalga oshirildi. Marshrut O‘zbekiston – Qirg‘iziston – Xitoy – Mo‘g‘uliston yo‘nalishi orqali o‘tdi. Bu tashabbus mahalliy ishlab chiqaruvchilarning eksport salohiyatini kengaytirish va yangi xalqaro logistika yo‘llarini yo‘lga qo‘yishga qaratilgan.

Loyiha O‘zbekiston Respublikasi Transport vazirligi va Savdo-sanoat palatasi hamkorligida amalga oshirildi. Uning asosiy maqsadi — O‘zbekiston mahsulotlari uchun yangi tashqi bozorlarga chiqishni taʼminlash va yangi transmilliy logistika marshrutlarini sinovdan o‘tkazishdan iborat.

Pilot tashuvda milliy yuk tashuvchi shirkat ishtirok etdi. Avtomobil qariyb 4500 kilometr masofani 8 kunda bosib o‘tdi. Yo‘nalish Altay tog‘lari orqali o‘tgan bo‘lib, ayrim qismlarda yo‘l dengiz sathidan 1500 metr balandlikka chiqadigan qiyin uchastkalarni ham o‘z ichiga olgan.

Bu tashuv — Markaziy Osiyoni Osiyo-Sharqiy mintaqasi bilan bog‘lovchi yangi eksport yo‘lagini shakllantirish sari muhim qadam bo‘lib, kelgusida Mo‘g‘uliston orqali Xitoy va Rossiyaning shimoliy bozorlariga chiqish imkonini yaratadi.