Toshkent, O‘zbekiston (UzDaily.uz) — Oʻzbekiston Respublikasi Investitsiyalar, sanoat va savdo vaziri oʻrinbosari boshchiligidagi delegatsiya Qozon shahrida boʻlib oʻtgan “Rossiya – Islom olami: KAZANFORUM” XVI xalqaro iqtisodiy forumida ishtirok etdi.

"Made in Uzbekistan" milliy stendida 75 ta ishlab chiqaruvchining 100 dan ortiq mahsulot nomlari namoyish etildi. Sanoatning asosiy tarmoqlariga qurilish materiallari, toʻqimachilik, elektronika, farmatsevtika, qishloq xoʻjaligi va mebel sanoati kiradi.

Oʻzbekiston jamoaviy stendiga forumning yuqori martabali mehmonlari – Ozarbayjon Bosh vaziri oʻrinbosari Shahin Mustafoyev, Tatariston Raisi Rustam Minnixanov, “Agalarov Development” kompaniyasi prezidenti Emin Agalarov va koʻplab ishbilarmon doiralar vakillari tashrif buyurishdi.

Forum doirasida 50 dan ortiq B2B uchrashuvlari o'tkazildi. Kun tartibida Oʻzbekiston mahsulotlarini Rossiyaga yetkazib berish boʻyicha yangi eksport shartnomalari, shuningdek, birinchi navbatda ikki mamlakat hududlari oʻrtasida qoʻshma ishlab chiqarish loyihalarini amalga oshirish istiqbollari muhokama qilinadi.