Toshkent, O‘zbekiston (UzDaily.uz) — 2025 yil 1 iyul holatiga ko‘ra, O‘zbekiston tijorat banklarida joylashtirilgan depozitlarning umumiy hajmi 355,62 trln so‘mni tashkil etdi. Bu haqda Markaziy bank maʼlumot berdi.

Davlat ishtirokidagi banklar 183,97 trln so‘m miqdorida depozit jalb qilgan bo‘lib, bu umumiy hajmning 52 foizini tashkil qiladi. Xususiy banklar hissasi esa 171,66 trln so‘m yoki 48 foizga teng.

Depozit bazasi bo‘yicha yetakchi o‘rinni O‘zmilliybank egallab, 44,55 trln so‘mlik depozitga ega bo‘ldi. Bu bank tizimidagi umumiy depozitlar hajmining 13 foiziga teng.

Ikkinchi o‘rinda — Kapitalbank, undagi depozitlar 38,18 trln so‘mni (11%) tashkil qiladi. Uchinchi o‘rin — O‘zsanoatqurilishbankiga tegishli bo‘lib, u 27,17 trln so‘mlik (8%) depozitga ega.

Xususiy banklar orasida ham Xamkorbank (12,73 trln so‘m) va Ipak Yo‘li banki (11,88 trln so‘m) ko‘rsatkichlari bilan ajralib turadi.

Eng kichik depozit hajmi Smart bankda (23 mlrd so‘m), Eron Saderat bankida (54 mlrd so‘m) va Yangi bankda (353 mlrd so‘m) qayd etilgan. Yevrosiyo banki esa depozit jalb qilmagan.

Davlat banklari orasida eng past ko‘rsatkich Turonbank (5,72 trln so‘m), Aloqabank (14,80 trln so‘m) va Mikrokreditbankka (8,76 trln so‘m) tegishli.