Toshkent, O‘zbekiston (UzDaily.uz) — O‘zbekiston hukumati yaqin yillarda tabiiy gaz narxlariga subsidiya berishdan voz kechish niyatida emas. Bu tariflarning oshishi va davlat tomonidan qo‘llab-quvvatlashni bosqichma-bosqich tugatish haqidagi avvalgi bayonotlarga qaramay amalga oshirilmoqda. Bu haqda Iqtisodiyot va moliya vazirligi tomonidan eʼlon qilingan 2026–2028 yillarga mo‘ljallangan yangi Fiskal strategiyada qayd etilgan.

Hujjatga ko‘ra, 2025 yilda davlat byudjeti hisobidan gaz ishlab chiqarish yoki importning bozor narxi bilan ichki isteʼmol uchun belgilangan chakana narxlar o‘rtasidagi farqni qoplash maqsadida 7 trln so‘m ajratish taklif qilinmoqda. Bu avvalgi strategiyada ko‘rsatilgan 6,4 trln so‘mdan ko‘proq.

2026 yil uchun 4,5 trln so‘m o‘rniga 5,9 trln so‘m, 2027 yil uchun esa 4,9 trln so‘m o‘rniga 5,5 trln so‘m ajratish mo‘ljallangan — bu ham avvalgi prognozdan yuqori.

2024 yil dekabrida bosh vazir o‘rinbosari, iqtisodiyot va moliya vaziri Jamshid Qo‘chqorov davlat tomonidan berilgan subsidiyalar bosqichma-bosqich qisqartirilib, 2028 yildan to‘liq tugatiladi, deb bayonot bergan edi. Unga ko‘ra, 2025–2026 yillarda subsidiyalar saqlanadi, 2027 yilda ular sezilarli darajada qisqartiriladi, 2028 yildan esa umuman bekor qilinadi.

Biroq yangi fiskal strategiyada 2028 yilda ham bu maqsadlar uchun 5 trln so‘m ajratish ko‘zda tutilmoqda. Bu esa davlat qo‘llab-quvvatlashini tugatish bo‘yicha avval eʼlon qilingan muddatlarni shubha ostiga qo‘yadi.