Toshkent, O‘zbekiston (UzDaily.uz) — O‘zbekiston Respublikasi Prezidenti Shavkat Mirziyoyev Sog‘liqni saqlash vazirining ikki nafar o‘rinbosarini lavozimidan ozod etdi.

Sog‘liqni saqlash sohasidagi islohotlarning navbatdagi bosqichi uchun ustuvor vazifalarni belgilashga bag‘ishlangan videoselektor yig‘ilishi davomida davlat rahbari vitse-ministrlar Davron Sultonov va Farruh Sharipov o‘z vazifalaridan ozod etilganini maʼlum qildi.

Bu qaror ularning faoliyatida aniqlangan kamchiliklar va yo‘l qo‘yilgan xatolar sababli qabul qilingan.

Bundan tashqari, Sog‘liqni saqlash vazirining yana bir o‘rinbosari Olim Omonovga qattiq ogohlantirish berildi: agarda yaqin olti oy mobaynida sohaga raqamli texnologiyalarni joriy etishda aniq natijalarga erishilmasa, u ham lavozimidan ozod etiladi.