Toshkent, O‘zbekiston (UzDaily.uz) — Ostonada Markaziy Osiyo mamlakatlari va Xitoy transport vazirlarining ikkinchi uchrashuvi bo‘lib o‘tdi.

Uchrashuvda Qozog‘iston Respublikasi transport vaziri Marat Karabayev, Xitoy Xalq Respublikasi transport vaziri Lyu Vey, Qirg‘iziston Respublikasi transport va kommunikatsiyalar vaziri Absattar Sirg‘abayev, Tojikiston Respublikasi transport vaziri Azim Ibrohim, Turkmaniston Vazirlar Mahkamasi huzuridagi Transport va kommunikatsiyalar agentligi bosh direktori Mammetxan Chakiyev va O‘zbekiston Respublikasi transport vazirining birinchi o‘rinbosari Mamanbiy Omarov boshchiligidagi besh mamlakat delegatsiyalari ishtirok etishdi.

Vazirlar mintaqada va jahonda transport sohasidagi mavjud vaziyat yuzasidan fikr almashib, Xitoy va Markaziy Osiyo davlatlari o‘rtasidagi iqtisodiy, savdo va gumanitar hamkorlikning butun salohiyatidan foydalanishning keng ko‘lamli masalalarini muhokama etishdi.

Olti tomonlama uchrashuv doirasida transport idoralari rahbarlari Markaziy Osiyo mamlakatlari va Xitoy o‘rtasida transport sohasida ko‘p tomonlama hamkorlik dasturini yaratish zarurligini ta’kidladilar.

Ushbu dastur elektron hujjat aylanishini va yuklar harakatini onlayn rejimda kuzatish imkoniyatini ta’minlaydi. Vazirlar xalqaro avtomobil tashuvlarini soddalashtirish va xorijiy ruxsatnoma blankalarini (XRB) almashish mexanizmini elektron shaklga o‘tkazishga intilmoqdalar.

Uchrashuvda vazirlar ikkita hujjatni imzoladilar: xalqaro avtomobil tashuvlarini amalga oshirishda raqamlashtirish sohasida hamkorlik to‘g‘risida anglashuv memorandumi hamda transport idoralari o‘rtasida anglashuv memorandumi.

Shuningdek, tomonlar avtomobil va temir yo‘l tashuvlarini amalga oshirishda Xitoy va Markaziy Osiyo davlatlari o‘rtasidagi o‘tkazish punktlarini kesib o‘tish tartibini soddalashtirish zarurligi to‘g‘risida umumiy fikrga kelishdilar.

Transport idoralari rahbarlari professional kadrlar tayyorlash sohasidagi hamkorlikni mustahkamlashni va ilmiy-tadqiqot hamda tahliliy markazlar o‘rtasida hamkorlik mexanizmini o‘rnatish imkoniyatini ko‘rib chiqish muhimligini qayd etishdi.

Shuningdek, xalqaro transport loyihalarini amalga oshirish uchun ilmiy qo‘llab-quvvatlashni ta’minlash maqsadida transport ta’limi sohasida hamkorlik qilish zarurligini ta’kidladilar.