Toshkent, O‘zbekiston (UzDaily.uz) — O‘zbekiston Maktabgacha va maktab taʼlimi vazirligi bolalarga nisbatan qo‘pol muomala qilish haqidagi shikoyatlar tufayli “Tanzilandiya” xususiy bog‘chasini sudga berdi.

Vazirlikning masʼul xodimlari arizalar kelib tushgandan keyin tahlil o‘tkazib, tekshiruv natijasida dalolatnoma tuzdi va hujjatni sudga taqdim etdi. Bu haqda vazir o‘rinbosari Sardor Radjabov maʼlum qildi.

Shuningdek, Senatning Fan, taʼlim va sog‘liqni saqlash masalalari qo‘mitasi raisi Baxtiyor Abdullayev vazir Xilola Umarovadan maktabgacha taʼlim muassasalarida, xususan, “Tanzilandiya” va Yunusobod tumanidagi First Daycare bog‘chasidagi zo‘ravonlik holatlarini tekshirishni so‘radi.

Mazkur holat bo‘yicha sud muhokamasi kutilayotgan bo‘lib, bog‘chada bolalarga nisbatan qo‘pol munosabat va huquqbuzarlik holatlari aniqlansa, qatʼiy huquqiy choralar ko‘rilishi mumkin.