Toshkent, O‘zbekiston (UzDaily.uz) — O‘zbekiston hukumati yaqinda avtomobillarini sertifikatlash jarayoni to‘xtatilgan Xitoyning Leapmotor kompaniyasi bilan muzokaralar olib bormoqda. Bu haqda Texnik tartibga solish sohasidagi nazorat inspeksiyasi maʼlum qildi.

Leapmotor kompaniyasi muhandislari yaqin kunlarda O‘zbekistonga tashrif buyurib, mahsulotlarini sertifikatlashga oid cheklovlar bilan bog‘liq masalalarni hal qilishda ishtirok etadi. Tashrif doirasida ular avtomobillarni qayta sinovdan o‘tkazishda qatnashadilar.

«Sinovdan o‘tkazish ishlari Leapmotor mutaxassislari ishtirokida amalga oshiriladi», — deyiladi inspeksiyaning bayonotida.

O‘zbekistonning texnik tartibga solish sohasidagi nazorat inspeksiyasi Xitoyning Leapmotor brendi ostida ishlab chiqarilgan yengil avtomobillarni sertifikatlash uchun arizalarni vaqtincha qabul qilmaslik haqida qaror qabul qildi.

28 mart kuni Euro Prof Test kompaniyasi Texnik tartibga solish agentligiga Leapmotor C16 avtomobilini sinovdan o‘tkazish jarayonida aniqlangan muammolar to‘g‘risida xabardor qiluvchi rasmiy maktub yubordi. Unda keng polosali elektromagnit xalaqitlar darajasi bo‘yicha talablarga mos kelmaslik holati qayd etilgan.

Buzilish holati bitta avtomobilda (maktubda uning VIN-raqami ko‘rsatilgan) aniqlangan. Agentlik muammo bartaraf etilgunga qadar Leapmotor kompaniyasining barcha avtomobillari bo‘yicha sertifikatlash arizalarini qabul qilishni to‘xtatishni tavsiya etdi. Sabab sifatida, elektromagnit xalaqitlar avtomobil tizimlarining ishdan chiqishiga olib kelishi mumkinligi taʼkidlandi.