Toshkent, O‘zbekiston (UzDaily.uz) — O‘zbekiston Markaziy banki maʼlumotlariga ko‘ra, 2025 yil iyun oyida bank sektoridagi kredit portfeli 1,3 foizga o‘sib, 575,2 trln so‘mdan oshdi. Shu bilan birga, sektor bo‘yicha muammoli kreditlar (NPL) ulushi 4,1 foizdan 3,8 foizgacha kamaydi.

Davlat banklarida bu ko‘rsatkich 4,1 foizdan 3,8 foizgacha, xususiy banklarda esa 4,3 foizdan 3,9 foizgacha pasaydi.

Eng sezilarli o‘zgarishlar quyidagi banklarda kuzatildi: “Ipoteka-bank”da muammoli kreditlar ulushi 9,5 foizdan 6,6 foizgacha, «Garant bank»da 18,9 foizdan 16,7 foizgacha, «Ziraat bank»da 6,3 foizdan 4,6 foizgacha, «Biznesni rivojlantirish banki»da esa 7,8 foizdan 6,1 foizgacha kamaydi.

Shuningdek, “Agrobank”da 4,2 foizdan 3,8 foizgacha, “Asakabank”da 4,8 foizdan 4,5 foizgacha, “Aloqabank”da 2,7 foizdan 2,4 foizgacha va «Oriyent Finans bank»da 2,2 foizdan 1,9 foizgacha tushishi qayd etildi.

Shu bilan birga, ayrim banklarda muammoli kreditlar ulushining o‘sishi kuzatildi. Jumladan, «Poytaxt bank»da bu ko‘rsatkich 0 foizdan 3,2 foizgacha, «Smart bank»da 0 foizdan 1,3 foizgacha, «Anor bank»da 3,1 foizdan 3,8 foizgacha, «Invest Finans bank»da 2,3 foizdan 2,8 foizgacha, «TBC Bank»da 3,7 foizdan 4,1 foizgacha va «Davr bank»da 3,0 foizdan 3,3 foizgacha ko‘tarildi.