Toshkent, O‘zbekiston (UzDaily.uz) — O‘zbekiston Respublikasi Prezidenti huzuridagi Ijtimoiy himoya milliy agentligida Agentlik direktori bilan Turkiya Respublikasining O‘zbekistondagi Favqulodda va Muxtor Elchisi janob Ufuk Ulutash o‘rtasida uchrashuv bo‘lib o‘tdi.

Uchrashuvda Turkiya elchixonasi vakillari, Agentlik xodimlari hamda O‘zbekiston Respublikasining Anqaradagi elchixonasi maslahatchisi ishtirok etdi.

Suhbat davomida ijtimoiy sohadagi amaldagi va istiqboldagi hamkorlik masalalari muhokama qilindi. O‘zbekiston va Turkiya o‘rtasidagi mustahkam, qardoshlik rishtalari, o‘zaro hurmat va hamkorlikni mustahkamlashga bo‘lgan intilish asosida rivojlanib borayotgani ta’kidlandi. Bolalarni himoya qilish, aholining ijtimoiy himoyaga muhtoj qatlamlarini qo‘llab-quvvatlash, ilg‘or tajriba almashish va qo‘shma gumanitar tashabbuslarni amalga oshirish yo‘nalishlarida ikki tomonlama hamkorlikning yuqori sur’ati qayd etildi.

Uchrashuvda, shuningdek, Turkiya hamkorlik va muvofiqlashtirish agentligi (TİKA) bilan amalga oshirilgan muvaffaqiyatli loyihalar va kelajakda bu kabi hamkorlikni kengaytirish imkoniyatlariga alohida e’tibor qaratildi.

Tomonlar Turkiyada yashayotgan O‘zbekiston fuqarolarining huquq va manfaatlarini himoya qilish bilan bog‘liq gumanitar masalalarni ham ko‘rib chiqdilar. Ijtimoiy siyosatda oilaning tutgan o‘rni va oilaviy qadriyatlarni mustahkamlash mavzusi alohida muhokama qilindi.

Uchrashuv yakunida aholining farovonligini oshirish va ikki davlat o‘rtasidagi do‘stona munosabatlarni mustahkamlashga qaratilgan amaliy hamkorlikni yanada rivojlantirishdan tomonlarning ikki tomonlama manfaatdorligi tasdiqlandi.