Toshkent, O‘zbekiston (UzDaily.uz) — Eron Islom Respublikasi Tashqi ishlar vazirligi matbuot kotibi Ismoil Bakayi “Tehran Times” gazetasida chop etilgan mualliflik maqolasida Isroilning yaqinda Eron hududiga qilgan hujumini “barcha xalqaro huquq normalarini buzuvchi ochiq tajovuz” deb atadi.

Diplomatning taʼkidlashicha, 2025 yil 23 iyun kuni Isroil hech qanday ogohlantirishsiz keng ko‘lamli harbiy amaliyot boshlab, yashash massivlari, infratuzilma va XAMA (MAGATE) nazorati ostidagi yadroviy obyektlarga zarbalar berdi.

«Aholi turar joyiga qilingan raketali hujum oqibatida 60 nafar tinch fuqaro, jumladan, 35 nafar ayol va bola halok bo‘ldi. Bu — yovuz jinoyat va BMT Ustavi hamda xalqaro gumanitar huquqning ochiqdan-ochiq buzilishi», — deya taʼkidladi Bakayi.

U Isroil harakatlari nafaqat mintaqaviy, balki global xavfsizlik tizimi uchun ham tahdid solishini bildirdi.

Eron TIVning fikricha, Isroil tomonidan hujum uchun bahona sifatida Eronning yadroviy dasturini ko‘rsatish asossiz va sunʼiy sababdir. Chunki ushbu obyektlar to‘liq xalqaro nazorat ostida bo‘lib, faqat tinch maqsadlarda foydalaniladi. Bakayi Xalqaro atom energiyasi agentligi rahbari Rafael Grossi BMT Xavfsizlik Kengashining favqulodda majlisida buni tasdiqlaganini eslatdi. U amalga oshirilayotgan rezolyutsiyalar yadroviy infratuzilmaning daxlsizligini kafolatlashini taʼkidlagan.

Diplomatning taʼkidlashicha, Eronning javob choralari “qonuniy, mutanosib va faqat harbiy obyektlarga yo‘naltirilgan bo‘lib, BMT Ustavining 51-moddasiga to‘liq muvofiqdir, u o‘zini himoya qilish huquqini nazarda tutadi”.

«Javob harakatlarimiz faqat harbiy ahamiyatga ega obyektlarga qaratilgan. Biz xalqaro gumanitar huquq tamoyillariga qatʼiy rioya qildik va tinch aholi orasidagi yo‘qotishlarni minimallashtirishga intildik», — dedi Bakayi.

Eron TIV matbuot kotibi BMT Xavfsizlik Kengashining sukut saqlayotganini keskin tanqid qildi va buni “jamoaviy xavfsizlik tizimining inqirozi” deb atadi. U 1981 yilda XK Isroilning Iroqdagi “Osirak” reaktoriga qilgan hujumiga zudlik bilan bayonot bilan javob qaytarganini, ammo hozirgi agressiya xalqaro munosabatsiz qolganini eslatdi.

Maqolasi yakunida Bakayi jahon hamjamiyatini birdamlikka chaqirdi:

«Biz barcha davlatlarni ushbu tajovuzni qoralashga va BMT Ustaviga sodiqligini tasdiqlashga chaqirimiz. Suverenitet torg qilinmaydi. Tinchlik — masʼuliyat bilan boshlanadi. Xalqaro hamjamiyat o‘zining masʼuliyatga tayyorligini ko‘rsatishi lozim».

Eron tomoni xalqaro tashkilotlar qonuniy huquqni zo‘ravon kuch bilan almashtirishga yo‘l qo‘ymasligi shartligini taʼkidlamoqda. Isroil esa xalqaro normalarni tizimli ravishda buzgani uchun javobgarlikka tortilishi kerak, deb hisoblaydi.