Toshkent, O‘zbekiston (UzDaily.uz) — Buxoro viloyatining bir nechta hududlarida zararli chigirtkalarining tarqalishi qayd etildi. Bu haqda O‘zbekiston Respublikasi Favqulodda vaziyatlar vazirligi matbuot xizmati xabar berdi.

Favqulodda vaziyatlar vazirligining Buxoro viloyati bo‘yicha bosh boshqarmasiga chigirtkalar paydo bo‘lgani haqida signal kelib tushdi. Xabar yuzasidan boshqarma xodimlari, O‘simliklar karantini va himoyasi agentligi mutaxassislari hamda boshqa hamkor tashkilotlar vakillari voqea joyiga chiqishdi.

Zarar ko‘rgan hududlarda qishloq xo‘jaligiga oid yerlar tezda qayta ishlandi – 15 ta maxsus texnika yordamida kimyoviy purkash ishlari olib borildi.

Hozirda viloyat hududida zararli chigirtkalar bilan bog‘liq vaziyat FVDqT xizmatlari tomonidan to‘liq nazoratga olingan.