Toshkent, O‘zbekiston (UzDaily.uz) — 8 may kuni Janubiy Farg‘ona kanalining suv sathi ko‘tarilishi natijasida Andijon viloyati Buvayda tumanidagi qator mahallalarda suv toshqini ro‘y berdi.

O‘zgidromet maʼlumotlariga ko‘ra, mazkur toshqin natijasida jami 560 ta xonadon zarar ko‘rdi.

Hodisa joyida oqibatlarni bartaraf etish bo‘yicha ishlar zudlik bilan boshlab yuborildi.

Dastlabki maʼlumotlarga ko‘ra, aholi orasida jabrlanuvchilar qayd etilmagan, moddiy zarar bo‘yicha maʼlumotlar aniqlashtirilmoqda.

Vaziyat munosabati bilan “O‘zbekgidroenergo” AJ Janubiy Farg‘ona magistral kanali bosh qismidan suv olish to‘liq to‘xtatilganini maʼlum qildi.

Hozirgi vaqtda masʼul xizmatlar aholi xavfsizligini taʼminlash va suv oqimlarining to‘siqsiz o‘tib ketishini taʼminlash maqsadida barcha zarur choralarni ko‘rmoqda.

Hududiy hokimliklar, qutqaruv xizmati va kommunal xizmatlar zarar ko‘rgan hududlarda vaziyatni barqarorlashtirish uchun harakatlarini muvofiqlashtirmoqda.

Favqulodda vaziyatlar vazirligi matbuot xizmati maʼlum qilishicha, hozirda Janubiy Farg‘ona kanalini yorilishi oqibatida taxminan 100 ta xonadonga suv kirgan.

Shundan 30 ta uyning ichkarisiga suv kirgan bo‘lsa, 70 ta holatda suv hovli yerlariga yetib borgan.

Hozirgi paytda FVV tomonidan hodisa oqibatlarini bartaraf etish ishlari davom ettirilmoqda.